校址:九龍彌敦道440號澤豐大廈2樓B室

電話:9203-0277

台灣之旅 - 施逹宗老師退休舞會:

八月三十一號係完美門第一次集体出埠旅行嘅大日子,唔係坐車去嗰隻,係搭飛機嗰種。因為老師嘅老師施達宗係台北舉行退休舞會邀請我哋嘅老師去表演,所以我哋一班貪玩嘅徒子徒孫就乘機攪左一個超級豪華旅行團去湊熱鬧嘞。

出發嗰日我哋一行廿十二人一早齊集香港國際機場, check-in 之後就正式上飛機嘞。可能因為接近開學嘅關係啦,成個機艙除咗我哋之外得嗰小貓三四隻,直情係包機咁樣呀,最意外嘅仲係俾我發現原來阿Sir都會口花花講吓D空姐靚唔靚 (*.*) ....(嘩嚘!乜佢原來咁鬼馬喎?)

抵達之後第一個旅遊點係北投嘅水都溫泉,唔知係唔係大家怕醜呢?所以除Miss同阿Sir外只有幾個同學仔去嗰度幫襯"白白豬",其餘嘅咪走 咗去 hi-tea 囉! 接住就去參觀珍珠養植場,然後就梗係去食"mum-mum"同番酒店攤頭吓啦。咪以為精力旺盛嘅我哋咁就一日喎,執番正嗰靚樣後,我哋先至叫做正式出去wet ........  燈 ! 燈!就係去見識台北嘅夜生活 - 百樂門夜總會嘞。嗰喥嘅音樂就真係麻嘛地嘞,不過可能我哋玩得投入啦,所以玩到打烊至返歸。之不過但係仲未完噃,事關九月一號係我哋靚女淇淇嘅牛一,於是我哋就靜靜雞咁摸去佢間房喥送個蛋糕過佢嘞。呵呵!估唔到佢仲好似好鬼死感動 tim ,而 啲男人嘿嘿就梗係乘機索吻啦。嗯!!! 還好只係索吻而唔係強吻,如果唔係就真係『世風日下,道德倫亡』囉^^"無去嘅同學睇嚟今次你哋走寶嘞!


第二日一早我哋就去咗圓山飯店同故官博物館參觀,見識過啲國寶後就去 咗食台灣料理,下午就分道揚鑣,有啲同學跟阿Sir返去睇比賽,有啲就去逛街同逛藝術館。

而晚上就係今次台北行嘅重頭戲參加施老師退休舞會。當晚衣香髮影,大家都盛裝出席。據小記所見台灣人跳國際標準舞嘅水準都好高,真係令我眼界大開。而阿Sir嘅表演就當然係精彩絕倫啦 !可惜舞會時間太短,大概10:30就完嘞,於是我哋班夜鬼又去咗蒲。今次係去逛台北著名嘅通化街夜市,仲食到肚仔都漲卜卜tim @~@

第三日早上本來係自由活動,但因為之前嗰晚跳唔夠皮,於是一瞓醒又走咗去雅仕達跳舞,咁大個人第一次跳早場,雖則大家都變晒熊貓,但亦能盡興而回。跟住就 返酒店集合,齊齊去買手信之後就正式去機場,結束我哋嘅台北之旅。

今次成個行程大家都玩得好開心,而今次無參加嘅同學,希望你哋下次可以跟埋我哋去玩啦!

本網頁內有不少香港常用字,如閣下的瀏覽器未能支援此一字庫,
請到以下特別行政區網站下載香港增補字符集